TUMKUMBUKE TINO JOAKIM MASENGE-ARAWA

 

TINO MASENGE MWENYE MIC MBELE AKIWA NA WENZIE WA SIKINDE

Tino Joakim Masenge, kwa wengi alijulikana kama Tino Masinge Arawa,    alizawa kijijini Maharo, wilaya ya Rombo mwaka 1961. Mwaka 1969 alianza shule Mkuu Extendes Primary school   na mwaka 1972, na akajiunga Kawe Primary School, akajiunga na Mzizima Secondary na kumaliza kidato cha nne 1980.

Alianza kuimba kwaya primary na pia alikuwa anapiga accordion. Babu yake alikuwa mpiga mbiu au chombo kijulikanacho kama iranda. Baba yake mdogo Francis Petro Masenge alikuwa mpiga accordion maarufu na kila mara alikuwa akikodishwa kusindikiza harusi kule kwao Rombo, pia alikuwa mtunzi wa nyimbo zilizogusa matatizo ya jamii yake na hivyo  kupendwa katika jamii yake. Kuna wakati aliwahi kumtungia wimbo binamu yake ambaye ni Baba wa Wabunge wawili maarufu akiimba kuwa mzee huyo akafungwe Sumbawanga kutokana na tatizo la kifedha lililotokea pale kijijini kwao. Wakati huo kufungwa Sumbawanga ilikuwa jambo kubwa na baya kwa mwenyeji wa Rombo. Wimbo ulipata umaarufu katika jamii pale Rombo.

Bendi  ya kwanza ya Tino ilikuwa Dar International Orchestra, alijiunga 1983 na kukaa nayo mpaka 1985. Alivutiwa na Marijani na akaanza kuimba nyimbo zake kabla hata ya kujiunga na Dar International. Na hii ilimrahisishia hata kuingia katika bendi hii na pia kuachiwa kuimba nyimbo nyingi za Marijani. Hakujiendeleza katika vyombo alitaka  ajikite zaidi katika uimbaji. Katika kipindi cha Dar International alijikuta amekuwa simulizi kiasi cha kwamba baada ya Fresh Jumbe kuondoka JUWATA alifuatwa ili kujaza pengo la Fresh. Katika bendi ya Dar International alishiriki kurekodi nyimbo kama Masudi, Ubaya wa Jirani na kadhalika.

Alikaa JUWATA JAzz kwa muda wa miaka mitano 1985 -1990, kati ya nyimbo zilizorekodiwa alizoshiriki ni Solemba. Tino alikuja kufuatwa na OSS Ndekule na kusaini mkataba wa miaka miwili lakini akadumu kwa mwaka mmoja kutokana na hali ya kutokuelewana na wenye bendi. Kwa kadri ya Tino katika mazungumzo yake, alisema kuwa  kulikuwa ni maslahi madogo na maelewano madogo kati ya wanamuziki na uongozi. Alipohama Ndekule akajiunga na  Sikinde mwaka 1991. Akiwa na kundi la Sikinde ndipo alipotunga kibao cha Arawa, kibao kilichompa umaarufu na hata kubakia na jina jipya la Arawa maisha yake yote. Akiwa Sikinde pia alitunga wimbo ulioitwa Jino la embe si dawa ya pengo. Tino na wenzie walianziasha bendi ambayo haikudumu muda mrefu iliyoitwa Super Sikinde Academia.
Baada ya hapo yeye na wenzie kadhaa walijikusanya na kuanzisha kundi la TZ Brothers.
 Tino aliwahi kusema moja wapo ya kitu kilichomfanya ahame Sikinde ni hali ya kuona kabanwa sana kiusanii akashindwa kuonyesha uwezo wake wote, na kujiona ni mtu wa kuitikia tu katika nyimbo licha ya kuimba na watu kama Marijani Rajabu  na Niko Zengekala.

Kundi la TZ Brothers lilipata ufadhili mkubwa kutoka kwa Simon Sewando, mwanamuziki wa zamani wa bendi za Kwiro na Mkwawa Secondary, ambaye ni mwalimu wa Chuo Kikuu cha Mlimani ambaye alitoa vyombo na kuwaeleza wanamuziki kuwa wajitegemee wakati huohuo wakimpa sehemu ya mapato katika kumrudishia gharama za kununua vifaa.
Walioanzisha TZ Brothers walikuwa Tino Masenge, Henry Mkanyia, Julius Mzeru Gaspar Kanuti, Kejeli Mfaume, Kalamazoo Nyembo, Siraji Lumumba, na Mzee Sewando Mwenyewe (ukitaka kujua hadith ya Mzee Sewando BONYEZA HAPA. Kati ya kibao kilicho tikisa sana cha bendi hii kilikuwa kibao Blandina Stanley au maarufu Funga Mtaa, kilichoanza kwa rumba lililoimbwa vizuri sana na Tino na kumalizika na mtindo wa Vanga. Bahati mbaya bendi ya TZ Brothers ilisambaratika.  
Tino Masinge nae alishatangulia mbele za haki, hatunae tena duniani MUNGU AMLAZE PEMA ARAWA